( 1 )
ح تكتشف الروح
الوحدة / مش كفاية اقتراب الشيب من اطراف الشعر / مش كفاية زحام الوجوه المحبوبة
الغايبة / مش كفاية كل ما يتآمر في وقتك على السعادة / لحظة واحدة ما بيعرفهاش غير
الأرواح المرهقة المبتسمة / لحظة واحدة ح تكتشف فيها الروح الوحدة
( 2 )
تعلم الصمت في حضور
خيالات الماضي / تهذب في مواجهة الخيال / تذكر انه لا يعين الحياة على تقبل فكرة
الموت غير الخيال / الخيالات اللي هجرتها
بكامل ارادتك / بكامل الارادة و القسوة /
ح تكتشف فجأة و في اللحظة المناسبة / انها الشئ الوحيد الباقي / بينتظرك هناك
( 3 )
الليلة الأخيرة /
واضحة تماما في الذاكرة / حتى نجومها لسه بتلمع في اماكنها / النجوم هي الكائن
الوحيد اللي ما بيبصش ابدا وراه / النجوم كانت شاهدة ليلتها عليك / على جنة
انتجتها بكامل وعيك / عشتها بكامل قوتك كما ينبغي ان تعاش السعادة / فاكر اذا كان
عندك وقتها فرق بين امل او يأس ؟؟ ما كانش فيه غير السعادة الصافية / ح تفضل
الليلة بكل شهودها حاضرة في الذاكرة / شاهدة على اللي استهلكته من سعادة / بددتها
بكامل الغرور و الانانية / علشان ما يفضلش في الآخر غير الخيال / المؤامرة الأكبر
على الزمن
( 4 )
مع اكتشاف الروح
للوحدة بيتشجع القلب في مواجهة ما مضى / اللي مش عايز ابدا يتلاشى / بيكتشف الذهن
روايات تانية لنفس الاحداث القديمة / الاحداث اللي سابت في النفس علامات باقية /
امام الروح في حضور الوحدة بتخشع الذاكرة / بتنحني امام الارواح الغايبة / و فجأة
بيظهر العمر / نقط متراكمة في كاس النسيان / مش مشكلة اللي عدا من العمر او ما تبقى
/ مش مشكلة تراكم النقط في الكاس / فقط تسلح بالشجاعة / و انتظر ساعات الوحدة
( 5 )
فقط
لو يعود لتراكم الانفاس انتظارا للنوم طعمها القديم / الله بيشارك في عذابنا بصمته
/ خيال بعد خيال بتتجمع الارواح الغايبة / في اللحظة المناسبة مش تتردد في
الاقتراب منك / بكل حيويتها و نشاطها / ما انكسر و ما لم ينكسر / ح تجده امامك
معلق على اشجار الانتظار / و مش ح تخاف
وقتها / و لا لغز من الغاز الماضي 
ليست هناك تعليقات:
إرسال تعليق