في الضل .... الى الذكرى الحبيبة الجميلة .. لعمي فتحي عواد

 
  للضل  عندي  اسطورة  ... 
اسطورة  باح  ليا  بيها  زمان  و انا صغير  .. 
  اول  ما بدأت  اكتشف  سحر  النسيم  .. 
  لما بيضرب  الوش  و هو  محمي  من الشمس  .. 
قال  لي  الضل  :  ان  فيه  ساعات   وحش   بيستخبى  فيه  .. 
بيفرض  نفسه  عليه  .. 
زي  ما بيحكوا  عن  جن و عفاريت  بيفرضوا  نفسهم  عالبشر   .. 
صديقي  الضل  .. قال لي   ان ده  وحش  مفروض  عليه  من قديم  الازل  .. 
و ان ما فيش حاجة  يقدر  يعملها  .. 
غير  انه  يحذر  اصدقاؤه  المخلصين  .. 
و يكرر  التحذير  .. 
ان  لو  و انت  في صحبة  الضل  و فاجأك  الوحش  ده  .. 
ممكن  يفرض  عليك  اليقين  ان  كل  ساعاتك  و لحظاتك  الحلوة  الجميلة  .. 
  اللي عدت  عليك  في حياتك  .. 
ممكن  ما تسيبش  جواك  غير  الالم  .. 
ان احلى  لحظاتك  و احلى  ساعات عمرك  .. 
ما يسيبش استرجاعها  جواك  .. 
غير  عذاب  اليقين  .. 
ان اللي  شاركوك  فيها  خلاص .. 
  ما بقوش  موجودين  .. 
يحاول  يقنعك  ان  ارتياحك  هو  في  نسيانها  .. 
...  و  لا   كأنك  عشتها  .. 
قال لي صديقي  الضل  و حذرني  : 
ممكن   يهاجمك  الوحش  ده  .. 
 و  يحاول  يفرض عليك  حضوره  .. 
يقول لك ان  اللي  جمعتك  بيهم الايام و الشهور و السنين  .. 
  مش فاضل  منهم  غير  ضل  .. 
ضل زيي انا  تمام  .. 
ضل  في الذاكرة  و في الروح  .. 
ضل  لكن  من نوع تاني  .. 
مش نسيم  منعش بيضرب الوش  المستخبي من الشمس .. 
لكن  تيار   من  الم  .. 
بيسري في عروق الزمن  .. 
ح  تيجي لي    فرصة  في  يوم  اكيد  .. 
اني  اقعد  مع  صديقي  الضل  قعدة  طويلة  من قعدات زمان  .. 
و اقول له  اشكرك يا صاحبي على تحذيرك  .. 
و اقول  له  اطمئن  .. 
لسه  الساعات  و اللحظات و الايام اللي فاتت جميلة  .. 
لسه  مالية الروح بحضورها و سحرها  .. 
و لا  ح  يقدر  عليها  و لا  عليك  .. 
كل وحوش الدنيا  .

ثلاثية للغد

ثلاثية   للغد  
______________________________
- نهاية  - 
ابتدا  يطمئن  لبكرة  .. الغد بقا  زي صديق زياراته  ممكن  تبقى  مبهجة  .. ما بقيتش  الاسئلة  بتتزاحم في  عقله  مع  بدايات  كل صباح  ..  و بقا  المساء بيحمل معاه  دايما  شعور  براحة   زي  الخدر  ..  تعب  في  الجسم  مع  راحة في  العقل   ..  ما امتع  مشاهدة  فيلم  سينما  ثم  الاستغراق  في  النوم  .. ما بقاش  محتاج  منبه  علشان  يصحى  ..  ما بقاش يهتم  بالانطباعات  النسائية   ..  فلتستتقل  دمه   كل   نساء   العالم  ..  مش مهم  ..  و لا   تفرق  ..  اسئلة  الضمير   بقت  سهلة  ..  و الاسهل  بقا  النسيان  .. كل   انواع   النسيان   ..
ادرك  انه  اخيرا   ..  بدأ  يعجز    .

- نوستالجيا -
بيحط  قايمة  بكل  الحاجات  اللي  ح  يحن ليها  لما  يجي  بكرة  ..  بيعاهد النفس  على انه  يحن  لحاجات معينة   ..  يجبرها  على  الحنين  ..  قرار  و اختيار  ..   ما  اثمن  الحنين  و  ما   اغلاه   ..  و   سيندم  اشد  الندم  .. كل انسان  يبدد  حنينه   بعفوية    ..   بيحط  قايمة  و  جدول  و   خطة  ..   ح  يحن  لكذا  و كذا  و كذا  ..   للمكان  الفلاني  .. و الانسان  الفلاني   ..   ح ينصح  كل  اصدقائه  انهم يجهزوا   حنينهم  و اشتياقهم  و يدربوا   النفس عليه   ..  ياخدوا  منه  رصيد  كافي  ..   بارد    بكرة   كمكان    جدا ..   فليجهز  الانسان  ..  و  ليستعد  . 

  - يقين - 
أهم  رواياته   ..   مش  ح تقع  عليها  عين  انسان غيره  ..    ح   يحط   اسماء  غير  الاسماء  .. و   يغير في الاماكن  و  التفاصيل  ..    يحكم   السرد  و   العقدة  و  البداية  و النهاية   .. و كأن  فعلا  ممكن  الناس  تقراها  ..  و   من  البداية  للنهاية   واضح  قدامه   الشرط  الاساسي   .. علشان تستحق   الرواية  فعلا   انها  تكون  العمل  الأهم  في  حياته   .. لازم قدرها  يكون  انها  تبتدي و تنتهي  بس على  الورق  .. انها  تشيل ارهاق  البوح  ..  من غير  راحة   الاعلان   ..  ان  تضن  بيها  الروح  على  العالم   ..  ان  تحتفل  النفس  لوحدها  من  غير  شريك  ..  و الكتابة  بتوصل  اخيرا  ..  لكلمة   :  تمت  .  


اللعب مع الاشباح


دورت  في  تجارب  كل أصدقائي  إللي بترهقهم  الاشباح
عددنا كبير  ..  ممكن نعمل جمعية أو منظمة  عالمية
شاور  لي  على  راجل  مسكونة  أيامه  و  اركانه  بالاشباح
ح تلاقي نفسك  بتشاور على  راجل ما قبلش  كل  إللي  بتحطه الدنيا  على  سفرته  و أكله  من دون  نقاش
على  حد  رفض يبلع  إللي موجود  و   راحت  نفسه   للأطعم 
  ح تلاقي  أكيد   الاشباح مستنياه  في  منتصف الطريق   او نهاياته  
واحد  من أصحابي  عنده   صندوق  مخصوص  
أتعلم كل ما يظهر  له    شبح ..  إنه  يحبسه  فيه  و  يقفل   با  احكام  
بس لازم  يتعود  التعايش مع  الضوضاء  إللي جاية  من  الصندوق 
صعب  تحبس عفريت  و تطالبه  بالصمت  
جربت  كل  إللي جربه  أصدقائي  إللي بتطاردهم الاشباح  
جربت لغاية  ما فقدت الامل  
لغاية  ما شاور  لي صديق  على الحل 
قالي   أفضل  حل  هو  إنك   تترقب  هجوم الشبح عليك 
و في اللحظة  المناسبة  
تمسكه  من قرونه  
ح يمسكك هو كمان .. و إللي ح  يتعب  منكم  و  تفلت  قبضته  الأول 
ح  يكون  المهزوم ..  و المنتصر  ح يفرض شروطه  
رغم  إنه  حل  مرعب ..  لكن   كان   لازم  اجربه  
و  فعلا  مسكت  الشبح  من قرونه 
و  مسكني  هو كمان  من  عبي  و ضغط  
رغم  إن قرونه  كانت  نار  بتغلي  في أيدي  
نار بتلسع  و تكوي في كل كياني  
رغم إن قبضته  كانت  حديد و فولاذ  بيعصر في صدري 
رغم صراخ العفريت  إللي كان  بيعصف  في ودني 
بيرج في طبلة الودن  و يوصل  لجذور  المخ 
رغم  عينه  إللي كانت  في عيني زي  مية   نار  بتلسعها 
إلا إني  فضلت  ماسك  و قابض على قرونه 
لغاية  أخيرا  ما حسيت  إن  قبضة العفريت  بتخف و تتلاشى 
لغاية ما حسيت  بنظرته  بتنكسر 
و  لغاية ما سمعته بوداني  بيترجاني إني اسيبه 
و بيوعد لو سيبته إني مش ح اشوفه تاني أبدا 
و لا  ح يضايقني  تاني  أبدا 
من يومها  و الاشباح  بتهرب  مني  
رجعت الايام  لصفائها 
و فضيت  الاركان  من  الرعب  و القلق  
بس برضه  بين  كل فترة  بعيدة  و التانية  
بيظهر  شبح جديد  
و با أعيد  الموضوع  معاه  من  أول  و جديد 
با امسكه  من قرونه 
لغاية  ما تخف  قبضته  و ينهزم  و  يهرب 
ما بقاش بيعكر  الايام  غير  اللحظات  إللي  أحيانا  بيلح  فيها السؤال او الخاطر  المرعب  
مش  إيه  إللي  ح   يحصل   لو  عفريت  مرة  كسب  ..
  و أنا  إللي أيدي  سابت  الأول  
لأن  ده  مستحيل  ح  يحصل   و لو اتحرقت  كفوف   أيدي  من الألم  
لكن  إيه إللي  ح يحصل  
لو فضلنا ماسكين في بعض للابد  ؟