مقبضة غرف الفنادق ....... الى ابي

مقبضة غرف الفنادق في رحلات السفر الطويل
الاضاءة الخافتة و تلفزيون بمحطات بلغات مختلفة 
و تشكيلة مكررة و مملة من المشروبات في الميني بار
كل شيئ مكرر و ممل
اسخف فكرة بتيجي عالبال هي النزول لبار الفندق
دايما فاضي في الاوقات دي من الليل
السخيف هو الفكرة اني ممكن الاقي امرأة وحيدة
شاعرة هي كمان با ان غرف الفنادق في ليالي السفر مملة و مقبضة
و قررت لسبب ما تنزل للبار
صدفة من الصدف اللي بتقرر المصير
ما فيش داعي لارهاق النفس في التفكير في مدى سخافة الفكرة
اسخف الافكار في الوجود
هي الافكار اللي بتحاول تحدي الملل
مش ح تلاقي لما تنزل البار غير بارمان وحيد بيلمع الكاسات
ح يبتسم لما يشوفك و يقول حاجة مرحة بصوت عالي
مقبضة ليالي الفنادق حتى على العاملين فيها
بيتراكم فيهم مع تتابع الايام ، كل ما في ليالي السفر
كل اللي بتسيبه غرف الفنادق في الليل
بسكونها و حيادها
ح اطلب كاس مارتيني و ابص على الشاشة في الركن العالي
لمحطة تلفزيونية من غير صوت
ح ابص على الكوبايات اللامعة و احاول ابلع اللحظة
ح يحط هو الكاس و يروح للركن البعيد ورا البار
يلمع تاني في الكاسات او يقلب في اوراق و حسابات
بينما في الواقع .. هو مستني مني بداية الكلام
البارمان المدرب لا يبدء ابدا في الحديث
بيسيب للزبون الوحيد الاختيار
اما الكلام .....
او المزيد من الوحدة
مقبضة غرف الفنادق بالليل
و كل البارمانات في ليل الفنادق مدربين على كل انواع التعامل
ح اشرب كاس و اتنين و تلاتة و ح تتكلموا في كل مواضيع الوجود
من غير ما تيجي المرأة الوحيدة المنتظرة
و تنقذنا في النهاية من الملل
هو الملل من تكرار الوجوه الهاربة للبار من الغرف الليلية المقبضة
و انا من تكرار الانتظار ..
و طول السفر
احسن حاجة اني ما انزلش و لا اروح لأي مكان
اني احدق في الشاشة اللي بتعرض اخيرا فيلم بلغة مفهومة
و اتظاهر بالاهتمام بالاحداث و المواقف
اضحك حتى على الموقف الكوميدي
اضحك بكل الطاقة المكتنزة في الضحك على ادعاء الفرح
اعدي الليلة دي كمان من ليالي السفر
في الغرف الليلية للفنادق
الغرف الليلية المقبضة
اعدي في الليلة دي و في اللي بعدها و في اللي بعدها
يمكن في يوم .. ينتهي الانتظار
او ينتهي السفر
او يمتلك الشعر اخيرا
شجاعة ادراك .....
ما يعنيه بجد فراق الاحبة 

مدهش ان البسيط هو ما ترك الجرح الاعمق

مع انتصاف العمر لا يطفو الا جروح الصبا 
كل ما اندفن في اركان الروح 
ما تخيل الذهن و العقل و الضمير انه انتهى و تلاشى 
هو اللي بيظهر مع نهايات الليل و يحارب النوم
هو اللي بيفاجئك مع تفتح العين في اول ساعات الصبح
يقتل اللذة في فنجان القهوة
و ينزع البهجة من اللون و النغم
ما يستدعيه فجأة مشهد في فيلم او فقرة في كتاب
جروح الصبا
نزوات الماضي البعيد جدا و الرجولة بتبدأ في تحسس طريقها
ابسط ما فيها من تفاصيل
اقل الامور تأثيرا في نظرك وقتها
هي اللي تركت الجروح الاعمق
الاشياء البسيطة
هي اللي حفرت في اعماق الذاكرة تفاصيلها
مدهش انك تحلم كما لو كان الزمن قابل للعودة
مش علشان تختار طريق آخر او تاخد خطوات تانية
مش علشان تغير اي مسائل مصيرية
بس لتمنع الدموع اللي سببتها في هذا اليوم
ايوه جرحتك اكثر من غيرها
و جرحتها انت كمان بكل طاقة على الايذاء مسلحة بيها انسجة القلب في شباب العمر
كل الجروح اندملت و انتهت
الا الدموع دي في اليوم ده
ازاي ممكن ارجاع الماضي
ازاي ممكن ايقاف الذهن عن استدعاء دمعة سالت على خد من احبه القلب يوما
سالت و حفرت في القلب الجرح الاعمق
هي و اشياء ثانية
اشياء بسيطة جدا تانية .